18.08.2017 996

Tadbirkorlar muammosi joyida hal etilmoqda


Mamlakatimizning iqtisodiy salohiyatini yanada yuksaltirishga qaratilgan sa’y-harakatlarning davomiyligini ta’minlash maqsadida Toshkent viloyati Prokuraturasi, Savdo-sanogat palatasi Toshkent viloyati boshqarmasi hamda boshqa viloyat tashkilotlari ishtirokida har haftaning chorshanba kuni viloyatning tuman va shaharlarida tadbirkorlar bilan uchrashuvlar o‘tkazib kelinmoqda.

Navbatdagi muloqot 2017 yil 16 avgust kuni Bo‘stonliq tumani Xo‘jakent pansionatida bo‘lib o‘tdi. Ushbu uchrashuvda Bo‘stonliq tumani hokimi B.Sultonov, Toshkent viloyat prokurori o‘rinbosari S.Berdialiev, O‘zbekiston Savdo-sanoat  palatasi Toshkent viloyati hududiy boshqarmasi boshlig‘i F.Mamanov, Bo‘stonliq tumani prokurori A.Gafurov va viloyat mutassadi tashkilotlari ma’sullari, Bo‘stonliq tumanida faoliyat olib boruvchi tadbirkorlar va ularga xizmat ko‘rsatuvchi tijorat banklari rahbarlari hamda keng jamoatchilik vakillari ishtirok etishdi.

    

Uchrashuvda O‘zbekiston Respublikasi Prezidentining 2017 yil 10 avgustdagi “Toshkent viloyatida kichik sanoat hududlarini tashkil etish to‘g‘risida”gi  №PQ 3194-sonli Qaroriga muvofiq, Toshkent viloyatining 17 ta tuman (shahar) larida kichik sanoat zonalari tashkil qilinayotganligi hamda mazkur sanoat hududlarida tashkil etiladigan tadbirkorlik sub’ektlariga beriladigan imtiyozlar haqida batafsil tushuntirishlar berildi.

Jumladan, kichik sanoat hududlari tadbirkorlik sub’ektlariga “0” stavkada ijaraga berilishi hamda tadbirkorlik sub’ekti mazkur sanoat hududida 10 yil davomida faoliyat ko‘rsatgandan keyin mulk huquqi berilishi tushuntirildi.

Shuningdek, mazkur kichik sanoat hududidagi tadbirkorlik  sub’ektlariga O‘zbekiston Respublikasi Prezidentining 2017-yil 18 maydagi №PQ-2973 Qaroriga muvofiq soliq imtiyozlari tadbir qilinishi to‘g‘risida axborot berildi.

Uchrashuvda o‘nlab tadbirkorlar faoliyatini rivojlantirish borasidagi masalalar yuzasidan murojaat qildilar.

Jumladan, Bo‘stonliq tumanida faoliyat olib borayotgan “Sintez Media” MChJ xususiy klinika va labaratoriya raxbari R.Mirzaaxmedov yangi va zamonaviy tibbiyot asbob uskunalar olib kelib o‘z faoliyatini kengaytirish maqsadida bo‘sh turgan tibbiyot birlashmasi binosini “nol” qiymatda olib foydalanishga amaliy yordam so‘rab murojaat qildi.

    

Tumanning Chorbog‘ xududida faoliyat olib boruvchi tadbirkor Sariboeva Farohat Chorbog‘ dexqon bozori xududidan engil tipdagi do‘kon qurilishiga ruxsat so‘rab murojaat qildi.

Tadbirda mamlakatimizda turimzni rivojlantirish masalalarida amalga oshirilayotgan ishlar o‘zining samarasini berib, tumanda turizm xizmatlari ko‘rsatuvchi yuzlab korxonalar faoliyat ko‘rsatmoqda. Ammo, turizm yo‘nalishidagi tadbirkorlik sub’ektlarini ro‘yxatdan o‘tib faoilyat yuritishlarini ta’minlash, turistlarga xizmat ko‘rsatish sifatini oshirish borasidagi  masalalar muhokama qilindi.

Jumladan, fuqaro Mirzayakubov Umid tumanda turizmni rivojlantirish maqsadida engil tipdagi quriladigan milliy o‘tovlarni qurish  uchun joy ajratish masalasida murojaat qildi.

Uchrashuvda ishtirok etgan tadbirkorlarga mutasaddi idoralar vakillari tomonidan javob berildi hamda masalalarni joyda, qonunchilikda belgilangan tartibda hal etish yuzasidan mas’ul xodimlar biriktirildi.

Ishtirokchilarda katta taassurot qoldirgan ushbu tadbirdan ko‘zlangan asosiy maqsad-mamlakatimizda yaratilgan qulay ishbilarmonlik muhitini yanada yangi bosqichga olib chiqish va tadbirkorlik sub’ektlari oldida paydo bo‘lgan muammo va to‘siqlarni o‘z vaqtida bartaraf etish hamda yangi ishchi o‘rinlari yaratishga qaratilgan sa’y-harakatlarni  barqarorligini ta’minlash shuningdek, ishlab chiqaruvchi korxonalarning eksport salohiyatini yuksaltirish va ushbu hududga  investitsiya jalb etgan holda yangi ish o‘rinlarini yaratishga qaratilgandir.

O‘zSSP axborot xizmati