28.06.2018 542

Tadbirkor huquqi va manfaati qonuniy himoya qilindi


O'zbekiston Savdo-sanoat palatasi a'zosi “RAUF AZIZ” xususiy korxonasi 2009 yildan buyon erkaklar ustki kiyimlarni ishlab chiqarish faoliyati bilan shug'ullanib keladi. Korxonada o'z faoliyatini yanada rivojlantirish, mahsulot ishlab chiqarish quvvatini oshirish, aholiga sifatli va arzon mahsulotlarni yetkazib berish hamda yangi ishchi o'rinlarni yaratish bo'yicha bir qator ishlarni amalga oshirib kelmoqda.

Bugungi kunda korxonada 50 nafardan ortiq ish o'rinlari yaratilgan. Korxona zamonaviy ishlab chiqarish texnologiyalari bilan jihozlangan va ishlab chiqarilgan mahsulotlar chet el davlatlariga eksport qilinib kelinmoqda. Shu orqali “RAUF AZIZ” xususiy korxonasi Vatanimiz ravnaqiga munosib hissasini qo'shib keladi.

Biroq, korxonada 2016 yil sentyabr oyida soliq organi xodimlari tomonidan korxonada qisqa muddatli tekshirish o'tkazildi. Tekshirish yakuniga ko'ra, korxonada hujjatli taftish o'tkazilgan. Natijada korxona ta'sischisi A.Turg'unbaevga nisbatan O'zbekiston Respublikasi Jinoyat kodeksining 184-moddasining 3-qismi, 228-moddasi 2-qismining “a,b” bandlari va 228-moddasining 3-qismi bilan, korxona rahbari U.Inomovga nisbatan O'zbekiston Respublikasi Jinoyat kodeksining 184-moddasining 3-qismi, 189-moddasi, 228-moddasi 2-qismining “a,b” bandlari va 228-moddasining 3-qismi bilan jinoyat ishi qo'zg'atilib, tergov ishlari olib borilgan.

Jinoyat ishlari bo'yicha Namangan shahar sudining ayblash haqidagi xukmiga ko'ra, korxona rahbari U.Inomov va korxona ta'sischisi A.Turg'unbaev O'zbekiston Respublikasi Jinoyat kodeksining 184-moddasi 3 qismi va 189-moddasida nazarda tutilgan jinoyatlarni sodir etganlikda aybli deb topilib, A.Turg'unbaev va U.Inamovlar hisobidan solidar tartibda Namangan shahar DSI foydasiga 563 763 300 so'm va 92 954 700 so'm solidar tartibda undirish, zararlarni undirish Namangan shahar prokuraturasi tomonidan xatlangan “RAUF AZIZ” xususiy korxonasi mol-mulklariga qaratilgan edi.

Boshqarma tomonidan O'zbekiston Respublikasi Savdo-sanoat palatasi orqali nazorat tartibida protest keltirish haqida O'zbekiston Respublikasi Oliy sudiga ariza bilan murojaat qilingan. Natijada O'zbekiston Respublikasi Oliy sudining ajrimi bilan  jinoyat ishlari bo'yicha Namangan viloyat sudi apellyatsiya instansiyasining ajrimi bekor qilinib, ishni ko'rish uchun jinoyat ishlari bo'yicha Farg'ona viloyat sudiga yuborildi.

Jinoyat ishlari bo'yicha Farg'ona viloyat sudida boshqarma xodimlari ishtiroki ta'minlanib, palata a'zosi “RAUF AZIZ” xususiy korxonasi rahbari U.Inamov va ta'sischisi A.Turg'unbaevlarning qonuniy huquq va manfaatlari himoya qilinib, sudining apellyatsiya sudlov xay'atining 2018 yil 19 iyun kungi ajrimiga asosan ularga nisbatan oqlov xukmi chiqarilishiga hamda korxonaga qarashli bo'lgan mol-mulklarini korxonaga qaytarilishiga erishildi.

O'zSSP Matbuot xizmati