10.09.2018 1288

“Yuridik xizmat va hakamlik sudlari: huquqiy asoslari va amaliyot” mavzusida seminar tashkil qilindi. 


“O'zdonmahsulot” aksiyadorlik kompaniyasi va O'zbekiston  Respublikasi Savdo-sanoat palatasi huzuridagi Hakamlik sudi  tomonidan joriy  yilning 8 sentyabr kuni Toshkent shahrida  “Yuridik xizmat va hakamlik sudlari: huquqiy asoslari va amaliyot” mavzusida seminar tashkil qilindi. 
Seminarda “O'zdonmahsulot” aksiyadorlik kompaniyasi va uning tarkibiga kiruvchi korxonalar yuridik xizmati xodimlari ishtirok etdilar. 

Unda “Yuridik xizmat faoliyatining huquqiy asoslari, dolzarb muammolari va ularning yechimlari”, “O'zdonmahsulot” aksiyadorlik kompaniyasi tizimidagi korxonalar huquq va qonuniy manfaatlarini himoya qilishda hakamlik sudlarining roli” mavzularida ma'ruzalar tinglandi.


“O'zdonmahsulot” aksiyadorlik kompaniyasi raisi Farrux Pulatov don va donni qayta ishlash mahsulotlarini saqlanishi, yetkazilgan zararlarni undirish, kontraktatsiya shartnomalari bo'yicha majburiyatlarni bajarmaganlik uchun penya va jarimalarni qo'llash, korxonalar huquq va manfaatlarini himoya qilishda yuridik xizmat xodimlarining roli va mas'uliyatini oshirish, shu bilan birgalikda ularni moddiy va ma'naviy rag'batlantirish bo'yicha chora-tadbirlar ko'rilishi lozimligiga e'tibor qaratdi.


O'zbekiston  Respublikasi Savdo-sanoat palatasi huzuridagi Hakamlik sudining raisi Foziljon Otaxonov o'z ma'ruzasida 2017-2021 yillarda O'zbekiston Respublikasini rivojlantirishning beshta ustuvor yo'nalishi bo'yicha Harakatlar strategiyasida belgilangan vazifalarni ijro etish, xususiy mulkchilik va tadbirkorlik sub'ektlarining huquqlari va qonuniy manfaatlarini ishonchli muhofaza qilish kafolatlarini kuchaytirish maqsadida 2018 yil 9 iyulda “O'zbekiston Respublikasi Savdo-sanoat palatasi to'g'risida”gi Qonun yangi tahrirda qabul qilinganligini ta'kidlab, mazkur Qonunga muvofiq Hakamlik sudlari ilk bor Palata tizimiga kiritilganligi, iqtisodiy nizolarni hal qilish uchun Palataga Hakamlik sudlarini tashkil etish huquqi berilganligi, Hakamlik sudlari Palata va uning hududiy boshqarmalari huzurida faoliyat ko'rsatishi alohida moddada belgilanganligini qayd qildi.

Seminar kun tartibidagi masalalar savol-javoblar asosida har tomonlanma muhokama qilindi. Jumladan, yuridik xizmat xodimlarining asosiy vazifalari, funksiyalari va javobgarligi, hakamlik muhokamasi afzalliklari, Hakamlik sudlariga murojaat qilish tartibi, uning hal qiluv qarorlarini ixtiyoriy va majburiy ijro qilish masalalari seminar ishtirokchilarida katta qiziqish uyg'otdi.

 

O'z SSP Matbuot hizmati