25.09.2018 3172

“Merritz” xalqaro yuridik kompaniyasi hamkorligida Xalqaro davra suhbati tashkil qilindi


2018 yil 25 sentyabrda Toshkent shahrida O'zbekiston Respublikasi Savdo-sanoat palatasi, Adliya vazirligi va “Merritz” xalqaro yuridik kompaniyasi  hamkorligida “O'zbekistonda xalqaro tijorat  arbitrajini rivojlantirishning dolzarb masalalari” mavzusida Xalqaro davra suhbati tashkil qilindi.

Seminarda O'zbekiston Respublikasi Oliy sudi, adliya, iqtisodiyot, moliya va tashqi savdo vazirliklari, Investitsiya bo'yicha davlat qo'mitasi, O'zbekston Savdo-sanoat palatasi mas'ul xodimlari, xalqaro tijorat arbitrajlarining arbitrlari, tijorat arbitraji sohasida faoliyat olib borayotgan Fransiya va O'zbekistonlik mutaxassislar, advokatlar va huquqshunos olimlar, shuningdek ommaviy axborot vositalari vakillari ishtirok etdilar.

Davra suhbatida O'zbekiston Savdo-sanoat palatasi huzuridagi Xalqaro tijorat arbitraj sudining raisi Foziljon Otaxonovning “O'zbekistonda Xalqaro tijorat arbitraji to'g'risida”gi qonun loyihasi va konsepsiyasi bo'yicha kelib tushgan taklif va mulohazalar haqida” va  Xalqaro savdo palatasi huzuridagi Xalqaro arbitraj sudining (Parij) vitse-prezidenti, professor Muxammad S.Abdel Vaxabning “Xalqaro tijorat arbitrajining huquqiy asoslari: xorij tajribasi” mavzularidagi ma'ruzalari tinglandi.

Ma'ruzalarda ta'kidlanganidek, mustaqillik yillarida O'zbekistonda kichik biznes va xususiy tadbirkorlikni jadal rivojlantirish uchun qulay shart-sharoit yaratish, xususiy mulk muhofazasi va kafolatlarining huquqiy mexanizmlarini yanada mustahkamlash, tadbirkorlikni rivojlantirish yo'lida byurokratik to'siqlarni bartaraf etish, investitsiya muhiti va ishbilarmonlik holatini yaxshilashga qaratilgan chora-tadbirlar izchil ravishda amalga oshirilmoqda.

Chet el investitsiyasi, shu jumladan to'g'ridan-to'g'ri investitsiyalarni jalb qilishdan manfaatdor bo'lgan davlatlar uchun qulay huquqiy muhit yaratish, qonunlar va ularni qo'llash amaliyotini takomillashtirish ustuvor yo'nalish hisoblanadi.  Xalqaro tijorat nizolarni hal qilish sohasi davlatning pozitiv faoliyatining juda muhim ob'ektlaridan biridir. Obro'li, yuqori malakali arbitraj xalqaro tadbirkorlik muhitida davlatning ijobiy qiyofasini shakllantiradi, uning salohiyatini (reputatsiyasini) mustahkamlaydi, o'z navbatida iqtisodiyotni barqarorlashtirishga, shu jumladan qulay investitsiya muhiti yaratish orqali olib keladi.

Shuning uchun ham, O'zbekistonda mazkur sohadagi xalqaro bitimlarga qo'shilish bo'yicha maqsadli va bosqichma-bosqich ishlar amalga oshirilmoqda. Xususan, O'zbekiston 1993 yil 7 mayda tashqi iqtisodiy faoliyatni rag'batlantirish, O'zbekiston Respublikasida xorijiy investorlarning xalqaro miqyosda e'tirof etilgan kafolatlarini ta'minlash va himoya qilish maqsadlarida Davlatlar va ajnabiy shaxslar o'rtasidagi investitsiyaga doir nizolarni hal etish tartibi to'g'risidagi (1965 yil Vashingtonda qabul qilingan) Konvensiyaga, 1995 yil 22 dekabrda esa Chet el arbitrajlari qarorlarini tan olish va ijroga qaratish to'g'risida 1958 yil 10 iyundagi Nyu-York Konvensiyasiga qo'shilgan.

Bu sohadagi mamlakatimizning mantiqiy qadami xalqaro tijorat arbitraji to'g'risidagi qonunni qabul qilishdir. Shuning uchun ham O'zbekiston Savdo-sanoat palatasi tomonidan O'zbekiston Respublikasi Prezidentining 2017 yil 19 iyundagi PF-5087-sonli «Biznesning qonuniy manfaatlari davlat tomonidan  muhofaza qilinishi va tadbirkorlik faoliyatini yanada rivojlantirish tizimini tubdan takomillashtirishga doir chora-tadbirlar to'g'risida»gi va 2018 yil 1 avgustdagi PF-5495-sonli “O'zbekiston Respublikasida investitsiya muhitini tubdan yaxshilash chora-tadbirlari to'g'risida” farmonlari ijrosini ta'minlash yuzasidan O'zbekiston Respublikasining “Xalqaro tijorat arbitraji to'g'risida”gi qonun loyihasi tayyorlandi va Vazirlar Mahkamasiga kiritildi.

Tadbir ishtirokchilari tomonidan qonun loyihasi bo'yicha manfaatdor vazirlik va idoralar tomonidan tushgan taklif va mulohazalar atroflicha muhokama qilindi va Qonun loyihasi xalqaro andozalarga to'la mos keladi va uni qabul qilish uchun parlamentga kiritish maqsadga muvofiq degan taklif berdilar.

Davra suhbati ishtirokchilarining umumiy fikrlari bo'yicha bunday tadbirlar nafaqat arbitraj muhokamasini takomillashtirish va uning huquqiy bazasini mustahkamlashga, balki biznesning, shu jumladan xorijiy investorlarning huquq va manfaatlarini samarali himoya qilishga, bu sohadagi milliy tajribamizni chet ellarda keng targ'ib qilishga xizmat qiladi.

 

 

O'z SSP Matbuot xizmati