12.04.2019 1270

Hakamlik sudlariga tadbirkorlar ishonchi ortmoqda.


Mamlakatimizda tadbirkorlik, tijorat va xususiy sektorga nisbatan munosabatlarni tubdan o'zgartirish, ularning huquqlarini poymol qilinishiga yo'l qo'ymaslik, qonuniy manfaatlari himoyasini ta'minlashga qaratilgan huquqiy himoya qilish tizimi shakllantirildi va uning tashkiliy mexanizmi takomillashib bormoqda. Bu borada nizolarni muqobil hal etishda asosiy nodavlat organ sifatida faoliyat yuritib kelayotgan Hakamlik sudlarining o'ziga xos o'rni bor.

Shuning uchun ham O'zR SSP Ijroiya qo'mitasining qarori bilan     tadbirkorlik sub'ektlari huquqiy himoyasini kuchaytirish, nizolarni hal qilishning muqobil usullaridan keng foydalanish, palata a'zolari va xodimlarining bu boradagi huquqiy bilimlarini oshirish maqsadida Palata tizimida har oyning so'nggi seshanba kuni "Hakamlik sudi" kuni deb belgilangan.

Shu munosabat bilan 2019 yil 11 aprel kuni Palata raisining birinchi o'rinbosari I.K.Jasimov raisligida video-konferensiya tashkil qilindi. Unda palata tizimidagi barcha Hakamlik sudlarining raislari va sudyalari, hududiy boshqarmalar boshliqlari, yuridik xizmat xodimlari ishtirok etishdi.

O'zbekiston Respublikasi Savdo-sanoat palatasi va uning hududiy boshqarmalari huzurida tashkil qilingan Hakamlik sudlari tomonidan olib borilayotgan ishlar natijasida ularga da'vo arizalari bilan murojaatlar soni yildan yilga ko'paymoqda.

Video-konferensiyada viloyatlar hududiy boshqarmalari huzuridagi Hakamlik sudlarining 2019 yil birinchi choragida ko'rilgan ishlari to'g'risidagi axborotlari tinglandi, bu sohadagi mavjud muammolar va ularni bartaraf qilish, shuningdek Hakamlik sudoari faoliyatini yanada takomillashtirishga qaratilgan taklif va tavsiyalari  muhokama qilindi.

O'zbekiston Respublikasi Savdo-sanoat palatasi va uning hududiy boshqarmalari huzurida tashkil qilingan Hakamlik sudlari tomonidan 2018 yil birinchi choragida jami 834 ta ishlar hal qilingan bo'lib, da'vo summasi 104 mlrd. so'm, 1 399,9 ming. AQSH dollarini tashkil qilgan bo'lsa, 2019 yilning 1 choragida 1726 ta ishlar kelib tushgan bo'lib, da'vo summasi 30,5 mlrd. so'm, 31,5 ming.AQSH dollari, 875 ming Yevroni tashkil qilgan. Bu 2019 yil birinchi choragida ko'rilgan ishlar soniga nisbatan ikki baravardan, ya'ni 892 taga ko'pdir.

Ayniqsa, Savdo-sanoat palatasining Namangan (398 ta ish ko'rilgan), Samarqand (208 ta), Xorazm (195 ta) viloyat hududiy boshqarmalari huzuridagi Hakamlik sudlarida ko'rilgan ishlar soni keskin oshgan.

Tadbirda so'zga chiqqanlar Hakamlik sudini rivojlantirish bo'yicha va yo'l qo'yilgan kamchiliklarni barataraf qilish bo'yicha o'z fikr-mulohazalarini bildirdilar. Xususan, Hakamlik sudlari to'g'risidagi normativ-huquqiy hujjatlar va lokal hujjatlarning mazmuni, mohiyati va ahamiyatini ko'rgazmali vositalar orqali tushuntirish; tadbirkorlik sub'ektlari o'rtasida yuzaga kelgan nizolarni Hakamlik sudlarida hal qilishning afzalliklari va o'ziga xos xususiyatlarini ommaviy axborot vositalarida muntazam yoritish; Hakamlik sudlari bilan iqtisodiy sud va fuqarolik ishlari bo'yicha sudlar hamkorligida seminarlar tashkil qilish; Hakamlik sudlari moddiy-texnika bazasini mustahkamlash lozimligini ta'kidlandi. 

Tadbir ishtirokchilari yakdillik bilan Hakamlik sudlari o'z faoliyatini qonuniylik, mustaqillik, hakamlik muhokamasi ma'lumotlarining oshkor qilinmasligi, hakamlik sudyalarining xolisligi, dispozitivlik, hakamlik muhokamasi taraflarining tortishuvi va teng huquqliligi kabi pritsiplariga rioya qilgan holda amalga oshirishini e'tiborga olib, joriy yilda ularda ko'riladigan ishlar sonini kamida ikki baravarga oshirish maqsadga degan xulosaga keldilar. 

 

 

O'z SSP Axborot xizmati