18.11.2019 2429

O‘zbekiston sanoat yarmarkasi va kooperatsiya birjasi o'z ishini boshladi


Bugun, 18 noyabr kuni “O‘zekspomarkaz” milliy ko‘rgazmalar majmuasida O‘zbekiston Respublikasi Iqtisodiyot va sanoat vazirligi, Investisiyalar va tashqi savdo vazirligi, Savdo-sanoat palatasi hamda qator tashkilotlar hamkorligida “O‘zbekiston sanoat yarmarkasi va kooperatsiya birjasi” ochilish marosimi bo‘lib o‘tdi.

O‘zbekiston sanoat yarmarkasi va kooperatsiya birjasi ochilish marosimi ochilishida O‘zbekiston Respublikasi Bosh vazirining o‘rinbosari E.G‘aniev, O‘zbekiston Respublikasi Iqtisodiyot va sanoat vaziri B.Xodjaev, O‘zbekiston Respublikasi Savdo-sanoat palatasi raisi A.Ikramov, ishtirok etishdi. Ko‘rgazma ochilishidan so‘ng vazirliklar vakillari maxalliy tadbirkorlar ishlab chikarayotgan maxsulotlar bilan tanishishdi. 

Bu yilgi ko‘rgazma maydoni 18 000 kvadrat metrni tashkil etib, 1, 2, 3 va 4 pavil'onlarni o‘z ichiga qamrab oldi. Sanoat yarmarkasi va kooperatsiya birjasida 1000 ga yaqin respublikadagi sanoat ishlab chiqarish korxonalari o‘zlarining  10 000 tadan ortiq maxsulotlar namunalari bilan ko‘rgazmali ishtirok etishmoqda. Ko‘rgazma ishtirokchilari o‘zlari ishlab chiqarayotgan yoki o‘zlashtirilishi rejalashtirilayotgan mahsulotlar, sanoat kooperatsiyasi orqali mahalliylashtirishga taklif qilinayotgan mahsulotlar turlari hamda istiqbolli loyihalari bilan qatnashmoqda. Barcha viloyatlar o‘zlarida mavjud bo‘lgan, biroq hali talab darajasida foydalanilmayotgan iqtisodiy, moliyaviy, mehnat resurslarini va istiqbolli loyihalarni taklif etmoqda.

Ko‘rgazma doirasida, “O‘zekspomarkaz” Xalqaro savdo markazi (ITC) binosida tarmoq va xududlarda sanoat saloxiyatini oshirishga qaratilgan taqdimotlar tashkil etilganligi, shuningdek yarmarkaga tashrif buyurgan mamlakatdagi ishbilarmon doiralar, xo‘jalik birlashmalari, yirik sanoat korxonalari xamda kichik biznes va tadbirkorlik sohasi vakillari o‘rtasida hamkorlikni yanada mustahkamlash va kengaytirishga qaratilgan В2В muzokaralari bo‘lib o‘tdi.

Shuningdek, O‘zbekiston Respublikasi Iqtisodiyot va sanoat vaziri B.Xodjaev va O‘zbekiston Respublikasi Savdo-sanoat palatasi raisi A.Ikramov boshchiligida press-brifing tashkil etildi.

Unda, Botir Xodjaev ushbu nufuzli tadbirdan ko‘zlangan maqsad mamlakatimiz sanoati hamda kooperatsiyasi rivojlanishi, sohada amalga oshirilayotgan o‘zgarishlarning amaliy natijalarini keng ommaga targ‘ib qilishga qaratilganligini ta'kidlab o‘tdi.

Savdo-sanoat palatasi raisi Adxam Ikramov o‘z nutqida bugungi yarmarkani tashkil etish g‘oyasi 15 sentyabrda davlatimiz rahbari tomonidan bo‘lib o‘tgan videoselektordagi topshirig‘iga binoan tashkil etilganligini ta'kidlab, respublikamizda import o‘rnini bosuvchi va eksportbop mahsulotlarni ishlab chiqarishni yanada kengaytirish, iqtisodiyotning turli tarmoqlari va kichik biznes sub'ektlari o‘rtasida sanoat kooperatsiyasini jadal rivojlantirish, hududlarning sanoat salohiyatini yanada kengaytirishga xizmat qilishini aytib o‘tdilar. “Respublika sanoat yarmarkasini o‘tkazish mobaynida tadbirkorlik sub'ektlari, sanoat tarmoqlari va kichik biznes sub'ektlari, respublikamizda ishlab chiqarilayotgan va o‘zlashtirish yo‘lga qo‘yilgan ilgari import qilinayotgan mahalliy mahsulotlarni xarid qilish hamda butlovchi qismlar, materiallar va xom-ashyolarni yetkazib berish bo‘yicha xo‘jalik shartnomalari tuzish imkoniyatga xam ega bo‘lishadi” – dedi Savdo-sanoat palatasi raisi Adxam Ikrаmov


Shu bilan birga, press-brifing mobaynida Iqtisodiyot va sanoat vazirligi huzurida tashkil etilgan elektron kooperatsiya Portalinig ochiq oydinlik, oshkoralik va shaffoflik tamoyillari asosida faoliyat ko‘rsatadigan savdo maydonchasi ishga tushganligi to‘g‘risida ma'lumot berildi. 

Xususan, elektron kooperatsiya Portali statistika, bojxona,soliq, sertifikatlashtirish idoralari ma'lumotlar bazasi bilan integratsiyalashgan bo‘lib, ushbu orqali foydalanuvchilar, ayniqsa tadbirkorlik soxasi vakillari onlayn tarzda muhim axborotlarga, jumladan respublikada  ishlab chiqarilayotgan sanoat mahsulotlarining turlari, texnik tavsiflari va sifat ko‘rsatkichlari haqida batafsil ma'lumotga ega bo‘lish kabi qulayliklar xaqida to‘xtalib o‘tildi.

Ko‘rgazma o‘z ishini 22 noyabrga qadar davom etadi, uning doirasida taqdimot va seminarlar o‘tkazilishi rejalashtirilgan.

SSP Axborot xizmati