12.05.2016 3151

O‘zbekistonda qishloq xo‘jaligi texnikalarini ishlab chiqarish bo‘yicha davra suhbati


O‘zbekiston Savdo-sanoat palatasi respublikamizda qishloq xo‘jaligi texnikalarini ishlab chiqarishni yanada kengaytirish, ayniqsa paxta terish mashinalarini ishlab chiqarishda mavjud muammolarini hal etish hamda tarmoqda sanoat va ilm-fan o‘rtasida kooperatsiyani yo‘lga qo‘yish maqsadida qishloq xo‘jalik texnikalarini ishlab chiqaruvchi korxonalar va davlat organlari ishtirokida davra suhbatini tashkil etishni rejalashtirmoqda.

Davra suhbatidan ko‘zlangan asosiy maqsad tarmoqda  qishloq xo‘jaligi mashina va texnikalarini ishlab chiqarishda ilg‘or texnologiyalar va innovatsiyalarni joriy etish, zarur butlovchi qism va komponentlarni o‘zlashtirishda mavjud texnologiya va jihozlarni modernizatsiya qilishning istiqbollari, yangi turdagi qishloq xo‘jaligi texnikalarni ishlab chiqarish imkoniyatlarini muhokama etish hamda tarmoqni kelgusida rivojlanishini ta’minlashga qaratilgan taklif va tavsiyalarni ishlab chiqishdan iboratdir.

Mazkur davra suhbati 2016 yil 20 may kuni soat 10-00 da Palataning katta majlislar zalida bo‘lib o‘tadi.

Ushbu tadbirda, O‘zbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Qishloq va suv xo‘jaligi vazirligi, Davlat bojxona qo‘mitasi, Davlat soliq qo‘mitasi, Markaziy bank, “O‘zagrosanoatmashxolding” XK, “O‘zstandart” agentligining mas’ul xodimlari va respublikamizda qishloq xo‘jaligi texnikalarini ishlab chiqarish sohasida faoliyat olib borayotgan sanoat korxonalari ishtirok etishlari kutilmoqda.

Yuqoridagilarni inobatga olib, ushbu tadbirda qishloq xo‘jaligi texnikalarini ishlab chiqarishni yanada kengaytirish, ayniqsa paxta terish mashinalarini ishlab chiqarishda mavjud muammolarini hal etishga qaratilgan aniq takliflarni hamda tadbirda tashkilotingizdan ishtirok etadigan mas’ul xodim (ismi-sharifi, lavozimi va telefon raqamlari) nomzodini 2016 yil 13 mayga qadar Palataning Zamonaviy mini-texnologiyalar va xorijiy investitsiyalarni jalb etish bo‘limining mas’ul xodimi Naim Temurxonga (t.naim@chamber.uz ) elektron ko‘rinishda taqdim etishingizni so‘raymiz.