02.07.2020 1578

O‘zbekiston-Italiya biznes-forumi tashkil etildi


2020 yil 2-iyul' kuni O‘zbekiston Respublikasi Savdo-sanoat palatasi O‘zbekiston Respublikasining  Italiyadagi elchixonasi va Italiya-O‘zbekiston savdo palatasi ("ITALUZ") bilan hamkorlikda videokonferensiya shaklida qishloq xo‘jaligi sohasiga oid O‘zbekiston-Italiya biznes-forumini tashkil etdi.

Ushbu videokonferesiyadan ko‘zlangan maqsad: eksportga yo‘naltirilgan qishloq xo‘jaligi mahsulotlarini ishlab chiqarishni rivojlantirish, shuningdek, O‘zbekiston va Italiya o‘rtasidagi savdo-iqtisodiy, sarmoyaviy va mintaqaviy hamkorlikni rivojlantirish.


Tadbirda O‘zbekiston Respublikasi Savdo-sanoat palatasi raisi Adham Ikramov, Italiya-O‘zbekiston savdo palatasi Prezidenti Luidji Iperti, O‘zbekistonning Italiya Respublikasidagi Favqulotda va Muxtor elchisi Otabek Akbarov, shuningdek, ikki mamlakatning agrosanoat sohasidagi ishbilarmon doira vakillari ishtirok etdi.
O‘zbekiston Savdo-sanoat palatasi raisi A. Ikramov o‘z nutqida, so‘nggi yillarda ikki mamlakat ishbilarmon doiralari o‘rtasidagi savdo-iqtisodiy hamkorlik faollashganini, tashkil etilgan qo‘shma tadbirlar buning tasdiqi ekanligini ta'kidladi.
O‘z navbatida janob Luidji Iperti O‘zbekiston Savdo-sanoat palatasiga Italiyadagi hamkor tashkilotlar bilan qo‘shma loyihalarni amalga oshirishda faol ishtirok va o‘zaro hamkorlik uchun minnatdorchilik bildirdi.


Onlayn tarzda bo‘lib o‘tgan konferensiyada meva-sabzavot, chorva mollarini yetishtirish, shuningdek, O‘zbekistonda meva va sabzavotlarni yig‘ish, saralash, qayta ishlash, sovutish tizimlari qolversa Italiyaning qishloq xo‘jaligi texnikalarini yetkazib berish borasidagi hamkorlikni kengaytirish masalalari muhokama qilinib, mazkur yo‘nalishlarda investisiya loyihalarini amalga oshirish masalasi ham ko‘rib chiqildi.
Videokonferensiyada Italiya kompaniyalari vakillari sohaga oid taqdimotlari bilan  ishtirokchilarni tanishtirib o‘tishdi.
Forumda O‘zbekiston Respublikasi Qishloq xo‘jaligi vazirligi bosh boshqarmasi boshlig‘i Ramin Hasanov, “O‘zbekozikovkatxolding” kompaniyasi raisining o‘rinbosari Baxodir Yunusov va “BMB Trade Group” bosh direktorining maslahatchisi Baxodir Komilov so‘zga chiqdilar.


Ikki mamlakat vakillari o‘rtasidagi ushbu videokonferesiya doirasida O‘zbekiston-Italiya savdo-iqtisodiy aloqalarini yanada rivojlantirish va ushbu sohada o‘zaro manfaatli hamkorlikni rivojlantirishning istiqbollari muhokama qilindi.

Shuningdek, qishloq xo‘jaligi sohasida faoliyat yurituvchi O‘zbekiston va Italiya kompaniyalari o‘rtasidagi sheriklik aloqalarini kengaytirish yuzasidan fikr almashildi.

Ochiq muloqot, istiqbolli loyihalar va kelishuvlar borasida yanada chuqurroq hamkorlik qilish, o‘zaro manfaatli yo‘nalishlarni aniq belgilash qolaversa, O‘zbekiston va Italiya ishbilarmon doiralari o‘rtasidagi o‘zaro munosabatlarning samarali tashkil etish imkonini berdi.


Ma'lumot uchun: Eslatib o‘tamiz, 2019 yil 21 noyabrda Lombardiya viloyati gubernatori A. Fontan boshchiligidagi delegasiya O‘zbekistonga tashrif buyurgan edi. Ushbu tashrif doirasida B2B formatidagi kooperasion birja va O‘zbekiston-Italiya biznes-forumi tashkil etilgan.

2019 yil yakunlariga ko‘ra mamlakatlar o‘rtasidagi tovar ayirboshlash 402,3 million AQSh dollarini tashkil etdi (2018 yilga nisbatan (303,2 million), o‘sish 32 foizga), bunda eksport 26,6 million dollarni, import  375,7 million dollar tashkil etgan.

O‘zbekistonda Italiya sarmoyasi ishtirokidagi 50 ta korxona faoliyat ko‘rsatmoqda, ulardan 14 tasi 100% italiya kapitali asosida ishlaydi.