03.09.2020 134

“Litsenziyalash va ruxsat berish tartib-taomillarini tubdan takomillashtirish chora-tadbirlari to‘g‘risida”gi Prezident Farmoni mazmun-mohiyati


I. Farmonning maqsadi

Lisenziyalash va ruxsat berish tartib-taomillarini tubdan takomillashtirish hamda byurokratik to‘siqlarni bartaraf etish orqali tadbirkorlik sub'ektlari faoliyati uchun yanada keng shart-sharoitlarni yaratish.

II. Farmonning mazmun-mohiyati

2021 yil 1 yanvardan boshlab:

37 ta lisenziya va 10 ta ruxsatnoma bekor qilinadi;

16 ta lisenziya va 11 ta ruxsatnoma birlashtirish yo‘li bilan bekor qilinadi;

17 ta lisenziya va 13 ta ruxsatnomalar xabardor qilish tartibi joriy etilishi yo‘li bilan bekor qilinadi;

14 ta turdagi lisenziya va ruxsatnomalarni rasmiylashtirish muddatlari qariyb 2 baravarga qisqartiriladi;

115 ta lisenziya va ruxsat berish xususiyatiga ega hujjatlarni olish tartib-taomillari yanada soddalashtiriladi.

Farmonga ko‘ra, xabardor qilish tartibi joriy etilgan faoliyat (harakat) uchun rasmiylashtirilgan lisenziya yoki ruxsat etish xususiyatiga ega hujjatlarning amal qilishi o‘z kuchida qoladi va ushbu faoliyat (harakat)ni amalga oshirish uchun vakolatli organni xabardor qilish talab etilmaydi.

2021 yil 1 yanvardan boshlab:

turizm faoliyatini lisenziyalashda turoperatorlar xizmatlarini sertifikatlash ixtiyoriy etib belgilanadi.

Quyidagilar bekor qilinadi:

kredit byurolari faoliyatini lisenziyalashda kamida 10 ta tijorat banki bilan kredit almashinuvini amalga oshirishga roziligini tasdiqlovchi hujjat mavjudligi talabi;

dori vositalari va tibbiy buyumlarni chakana realizasiya qilish faoliyatini lisenziyalashda ushbu faoliyat uchun lisenziyaga ega bo‘lgan yuridik shaxslar tomonidan ularning xuddi shunday faoliyat bilan shug‘ullanuvchi filiallari tashkil etilganda har bir filial manzilini asosiy lisenziyada ko‘rsatish amaliyotini joriy qilish orqali filiallarga alohida lisenziya rasmiylashtirish amaliyoti;

yer qa'ri uchastkalaridan foydalanish huquqi uchun lisenziya olishda talabgordan mahalliy davlat hokimiyati organlarining kafolat xatlarini olishni talab qilish tartibi.

Farmonga muvofiq, vakolatli organlar tomonidan quyidagi harakatlarning amalga oshirilishi taqiqlanadi:

lisenziyalar berish, ularning amal qilish muddatini uzaytirish va ularni qayta rasmiylashtirishda lisenziya talabgorining kommunal xizmatlar uchun to‘lovlar bo‘yicha qarzdorligi sababli davlat xizmatlari ko‘rsatishni rad etish;

lisenziya va ruxsat etish xususiyatiga ega hujjatlarni davlat organlari va tadbirkorlar o‘rtasida tuziladigan o‘zaro shartnomalarga almashtirish;

lisenziya va ruxsat berishga doir talab va shartlarda nazarda tutilmagan haq evaziga boshqa turdagi xizmatlardan foydalanishga yoki ruxsat etish xususiyatiga ega hujjatlarni olishga bevosita yoki bilvosita majburlash.

2020 yilda muddati tugaydigan barcha lisenziya va ruxsat etish xususiyatiga ega hujjatlarning amal qilish muddati 2021 yil 1 yanvarga qadar uzaytirildi.

2021 yil 1 yanvarga qadar lisenziyalash, ruxsat berish va xabardor qilish tartib-taomillari bilan bog‘liq barcha jarayonlarni qamrab olgan “Lisenziya” axborot tizimi ishlab chiqiladi.

Shuningdek, 2021 yil 1 yanvardan:

lisenziyalash, ruxsat berish va xabardor qilish tartib-taomillari bosqichma-bosqich to‘liq elektron tarzda “Lisenziya” axborot tizimi orqali amalga oshiriladi;

lisenziya sohasidagi qonun buzilishlari haqida xabar bergan shaxslar huquqbuzarlik o‘z tasdig‘ini topganda undirilgan jarimaning 10 foizi miqdoridagi pul mukofoti bilan rag‘batlantiriladi;

lisenziya va ruxsat etish xususiyatiga ega hujjatlarni tugatish va bekor qilish faqat sud tartibida amalga oshiriladi.

Farmonga ko‘ra, har bir lisenziyalash, ruxsat berish hamda xabardor qilish tartib-taomilining samaradorligi kamida har 5 yilda qayta ko‘rib chiqiladi.

Mutasaddi idoralar lisenziyalash va ruxsat berish tartib-taomillarini isloh qilishning ikkinchi bosqichida quyidagi normativ-huquqiy hujjatlar loyihasini ishlab chiqadi:

“Faoliyatning ayrim turlarini lisenziyalash to‘g‘risida”gi va “Tadbirkorlik faoliyati sohasidagi ruxsat berish tartib-taomillari to‘g‘risida”gi qonunlarni birlashtirish yo‘li bilan yaxlit qonun loyihasi;

2021 yil 1 fevralgacha lisenziyalash va ruxsat berish tartib-taomillariga oid qonunchilikni tizimlashtirish maqsadida ularning pasportlarini ishlab chiqish va kodifikasiyalash bo‘yicha normativ-huquqiy hujjat loyihasi.