01.12.2016 2542

ССП Хоразм вилояти ҳудудий бошқармаси томонидан ёшлар тадбиркорлигини ривожлантириш бўйича тадбирлар ўтказилди


Ўзбекистон Республикаси Президентининг 2016 йил 9 февралдаги ПҚ-2487-сон қарори билан тасдиқланган “Соғлом она ва бола йили” Давлат дастурининг 52-банди ва “Ўзбекистон Республикасида 2016 йилда ёшларга оид давлат сиёсатини амалга оширишга қаратилган қўшимча чора-тадбирлар” Дастурининг 28-бандлари ижросини таъминлаш ва касб-ҳунар коллежлари ва академик лицей битирувчиларининг бандлигини таъминлаш, уларда тадбиркорлик кўникмаларини шакллантириш, якка тартибдаги меҳнат фаолиятини, кичик бизнес ва хусусий тадбиркорликни, касаначиликни фаоллаштириш ҳамда уларга микромолиявий хизматлар кўрсатиш орқали янги иш ўринларини яратиш, улар ўртасида иш билан бандликни янада ошириш, мустақил ҳаётда ўз ўринларини топиш ва бизнесини йўлга қўйишда ҳар томонлама қўллаб-қувватлаш, тадбиркорлик қобилиятига, шу соҳада янги ҳамда самарали ғояга эга бўлган касб-ҳунар коллежлари ва академик лицей битирувчиларининг бизнес ғоясини қўллаб-қувватлаш, уларнинг бандлигини таъминлаш мақсадида ўрта махсус, касб-ҳунар таълими муассасалари битирувчи ўқувчилари ўртасида 2016 йил 18-20 апрель кунлари Урганч шаҳридаги ТАТУ Урганч филиали қошидаги 1-сонли академик лицейда “Менинг бизнес ғоям” танловининг вилоят босқичи ва унинг доирасида уч кунлик семинар-тренинг ўтказилди.

“Менинг бизнес ғоям” танловининг учинчи босқичи вилоят босқичида тадбиркорлик йўналиши бўйича ўз бизнес режасига эга бўлган ҳар бир тумандан 10 тадан жами 110 та иштирокчи иштирок этди. Учинчи босқичда иштирокчилар учун мутахассислар томонидан уларни тадбиркорлик соҳаларига (чорвачилик, паррандачилик, боғдорчилик, ишлаб чиқариш ва бошқалар) ажратган ҳолда  махсус семинар-тренинглар ташкил қилинди. Семинар тренинг давомида иштирокчиларда айнан ўзи танлаган тадбиркорлик йўналиши бўйича тажриба ва кўникмаларни шаклантириш бўйича машғулотлар ташкил қилинди. Махсус ўқув семинарлар якуни бўйича иштирокчилар вилоят Ишчи гуруҳи олдида ўз бизнес ғояларини тақдимот шаклида ҳимоя қилишди.

Танлов якунига кўра вилоят босқичида ғолибликни қўлга киритган қуйидаги 10 та касб-ҳунар коллежлари битирувчилари кейинги тўртинчи босқичи Республика босқичида йўлланма олишди.

2016 йилнинг 10-12 август кунлари ёш тадбиркорларга Урганч давлат университети биносида Ўзбекистон Савдо-саноат палатаси Хоразм вилоят ҳудудий бошқармаси, Марзазий банк вилоят бошқармаси,   “Микрокредитбанк”  АТБ Хоразм филиали, “Ипотека банк” АТИБ Хоразм вилоят филиали, “Ўзбекистон саноат-қурилиш банки” АТБ Хоразм минтақавий филиали, ДТ “Халқ банки” Хоразм вилоят филиали, ДАТ  “Асака” банк Хоразм вилоят филиали, ТИФ “Миллий банк” Урганч бўлими, “Қишлоқ қурилиш банк” АТБ Хоразм минтақавий филиали ҳамкорлигида “Ёш тадбиркор-юртга мададкор” танловининг вилоят босқичи 3 кунлик ўқув-семинар ҳамда бизнес режалар танлови тарзида ўтказилди.

Танловда Урганч шаҳар Ахборот-маслаҳат маркази директори Ш.Адамбаев томонидан “Бизнес режалар тузиш” мавзусида тақдимот ўтказилди.          Танловнинг асосий мақсади тадбиркорлик билан шуғулланмоқчи бўлган 18-30 ёшдаги ёш тадбиркорларни жалб қилиш, тадбиркорлик кўникмаларини шакллантириш, уларнинг тадбиркорлик фаолиятини қўллаб қувватлаш, ёш тадбиркорларнинг манфаатларини ҳимоя қилиш, имтиёзли микрокредит маблағлари билан таьминлаш ва уларни иш билан бандликка кўмаклашишдан иборат.

Лойиҳанинг саралаш босқичида 500 нафардан ортиқ ёшлар ушбу танловда қатнашиш мақсадида ариза билан мурожаат қилган бўлиб шулардан 110 нафари танловнинг вилоят босқичида иштирок этди. Танловнинг вилоят босқичи доирасида ташкил этилган семинар-тренинглар орқали иштирокчилар “Тадбиркорликни тартибга солувчи қонуний меъёрий ҳужжатлар”, “Кичик бизнесни солиққа тортиш”, “Бизнес режа”, “Маркетинг стратегиясини ишлаб чиқиш, бозорни ўрганиш ва сегментлаш” каби мавзуларда соҳа мутаҳассисларидан маълумотлар олишди.

Танловнинг Республика босқичига Хоразм вилоятидан 12 нафар иштирокчилар йўлланмани қўлга киритишди. Жумладан: Маткаримов Маткарим “Миллий ширинлик маҳсулотларини ишлаб чиқариш”, Атаниёзова Феруза “ Аёллар ва эркаклар сумкаларини ишлаб чиқариш”, Матназарова Шоҳиста “Иссиқхона ташкил қилиш”, Каримов Ўткирбек “Хоразм медиа” видео студия, Рахимов Суҳроббек “Болалар учун дам олиш маскани”, Жуманиязов Темур “Yurta Hostel”, Шихназаров Сирожиддин “Мебель ишлаб чиқариш”, Зарипов Хуршид “Оҳак ишлаб чиқариш”, Атабаева Шоира  “Миллий либослар маркази”, Карриев Шоназар “Ёш фотосуратчилар учун ўқув марказ”, Сапарбаева Мавжуда “Миллий ширинликлар ва қандолатчилик маҳсулотлари”, Матсапаев Шерхонбек “Аудиторлик ва бухгалтерия хизматлари” лойиҳалари билан ғолиб бўлишди.    

Жорий йилнинг 2 июль куни Урганч шаҳридаги “Хоразм палас” меҳмонхонасида бўлиб ўтган тадбирда Савдо-саноат палатаси Хоразм вилояти ҳудудий бошқармаси, Ўзбекистон Республикаси Марказий банки Хоразм вилояти бош бошқармаси, вилоят Адлия, вилоят давлат солиқ бошқармаси, хусусийлаштириш, монополиядан чиқариш ва рақобатни ривожлантириш давлат қўмитаси вилоят бошқармаси масъул ходимлари, “Камолот” ёшлар ижтимоий ҳаракати шаҳар, туман кенгашларининг тренерлари, тадбиркорлар, касб-ҳунар коллежлари битирувчилари ҳамда журналистлар иштирок этди.

Тадбирда Президентимиз раҳнамолигида ёшларнинг истеъдод ва салоҳиятини юзага чиқариши учун зарур шароитлар яратиш, интилиш ва ташаббусларини, айниқса, тадбиркорлик фаолиятини қўллаб-қувватлашга қаратилаётган доимий эътибор юксак самаралар бераётгани таъкидланди.

 Давлатимиз раҳбарининг 2014 йил 6 февралдаги “Ўзбекистон Республикасида ёшларга оид давлат сиёсатини амалга оширишга қаратилган қўшимча чора-тадбирлар тўғрисида”ги қарори бу борадаги ишларни янги босқичда давом эттиришда муҳим дастуриламал бўлмоқда.

Мазкур ҳужжат ижроси доирасида вилоятда 2015-2016 йилларда касб-ҳунар коллежларининг битирувчиларига тижорат банклари томонидан имтиёзли кредит маблағлари ажратилди. Тадбирда анъанавий тарзда ўтказиб келинаётган “Менинг бизнес ғоям”, “Йилнинг энг яхши ёш тадбиркори” кўрик-танловлари, “Ёш тадбиркор – юртга мададкор” лойиҳаси, “Ёшлар тадбиркорлигини ривожлантиришнинг долзарб масалалари” бизнес-форумини ўтказишнинг ташкилий жиҳатлари бўйича фикр алмашилди.

Ўзбекистон Савдо-саноат палатаси Хоразм вилоят ҳудудий бошқармаси ходимлари томонидан ёшларга тадбиркорлик фаолиятига оид ҳуқуқий-меъёрий ҳужжатларни расмийлаштириш, ёшлар тадбиркорлигини молиялаштириш ва кичик бизнесни кредитлаш, солиқ сиёсати, имтиёз ва преференциялар, техника-технологиялар, хомашё олиб келиш ва экспорт-импорт амалиётларини ривожлантириш, ёш тадбиркорларга ер, жой, биноларни имтиёзли ажратиш каби масалалар юзасидан атрофлича маълумот берилди.