28.08.2017 371

Қарор ва ижро: тадбиркорлар кичик саноат ҳудудларига ташриф буюришди


Ўзбекистон Республикаси Президентининг 2017 йил 10 августдаги “Тошкент вилоятида кичик саноат ҳудудларини ташкил этиш тўғрисида”ги  №ПҚ 3194-сонли Қарорига мувофиқ, Тошкент вилоятининг 17 та туман (шаҳар) ларида кичик саноат ҳудудлари ташкил қилинмоқда.

Бугунги кунда мазкур саноат ҳудудлари тўлиқ рўйхатдан ўтказилди, идоралараро ишчи гуруҳ тавсиясига асосан саноат ҳудудлари дирекцияси раҳбарлари тайинланди, саноат ҳудудлари ташкил этилиши режалаштирилган ҳудудларни ҳокимият тасарруфига ўтказиш ишлари амалга оширилмоқда. Шунингдек, саноат ҳудудларида тадбиркорлик фаолиятини ташкил этиш учун лойиҳаларга ажратилмоқда.

Жорий йилнинг 23-25 август кунлари Савдо-саноат палатаси Тошкент вилояти ҳудудий бошқармаси томонидан саноат ҳудудларида ишлаб чиқаришни ташкил қилмоқчи бўлган тадбиркорлар Чирчиқ ва Бекобод шаҳарлари ва Қибрай туманида ташкил этиладиган саноат ҳудуди билан таништирилди.

Савдо-саноат палатаси Тошкент вилояти бошқармаси ва маҳаллий ҳокимлик вакиллари томонидан саноат ҳудудларида ташкил этиладиган тадбиркорлик субъектларига бериладиган имтиёзлар ҳақида батафсил тушунтиришлар берилди. Кичик саноат ҳудудлари тадбиркорлик субъектларига “0” қийматда ижарага берилиши ҳамда тадбиркорлик субъектлари мазкур саноат ҳудудида 10 йил давомида фаолият кўрсатгандан кейин мулк ҳуқуқи берилиши қайд этилди.

"Priium Aparel", "Osiyo Bonus beton servis", "Pery Texnologes" OK, "Oftob Nuri", "Filter oil Trede", “Trans Elektromontaj” МЧЖ вакиллари Чирчиқ шаҳри  ва Қибрай туманларида ташкил этилаётган кичик саноат ҳудудларида амалга оширилиши режалаштирилган лойиҳалари билан ўртоқлашди.

“Tow Co., LTD” раҳбари Жунг Чи Хо Чирчиқ ва Бекобод шаҳрида ташкил этилаётган саноат ҳудудларида ишлаб чиқаришни ташкил қилиш учун мавжуд инфратузилмалар билан танишиб, мазкур ҳудудларда юқори технологияларга асосланган, экспортга мўлжалланган маҳсулотлар ишлаб чиқаришни режалаштираётганлигини билдирди.

Текстил соҳасида фаолият кўрсатадиган "Priium Aparel" МЧЖ саноат ҳудудида янги технологиялар асосида ишлаб чиқаришни ташкил қилиб, 400 та иш ўрни яратишни режалаштирган.

"Sardor Metal " МЧЖ раҳбари Х.Максудовнинг таъкидлашича саноат ҳудудининг ташкил этилганлиги бизнесни ривожлантириш, ишлаб чиқаришни ташкил қилиш ва кенгайтириш учун катта имконият яратади. Бугунги кунга қадар мазкур корхона ижара асосида фаолият кўрсатган. Ишлаб чиқаришини саноат ҳудудига жойлаштирилиши, тадбиркорлик фаолиятини рағбатлантиришга катта хизмат қилади. Корхона раҳбари Х.Мақсудов саноат ҳудудида “0” - қийматда ижара тўловлари амалга оширилиши, инфратузилманинг мавжудлиги, солиқ соҳасидаги имтиёзлар корхонани ривожлантиришни янги босқичга олиб чиқишга хизмат қилишини эътироф қилди.

Тошкент вилоятида ташкил этилаётган саноат ҳудудларига ташриф буюрган тадбиркорлар ўзларининг бизнес лойиҳаларини амалга ошириш юзасидан фикр ва мулоҳазаларини билдирди ҳамда саноат ҳудудида ишлаб чиқаришни ташкил этиш шартлари билан танишди.

Саноат ҳудудлари билан бевоита жойга чиқиб танишиш, ишлаб чиқаришни ташкил қилиш истагида бўлган тадбиркорлар ССП Тошкент вилояти ҳудудий бошқармасига мурожаат қилишлари мумкинлиги тушунтирилди.

ЎзССП ахборот хизмати