20.10.2017 1097

Ўзбекистон Республикаси Олий Мажлисининг Қонунчилик палатаси ва Ўзбекистон Республикаси Савдо-саноат палатаси ўртасида ҳамкорлик битими имзоланди.


Тадбиркорлик ҳар қандай мамлакат иқтисодиётини барқарор ривожлантириш, янги иш ўринлари яратиш ва аҳоли даромадларини оширишда энг муҳим омил саналади. Шу боисдан бугунги кунда мамлакатимизда кичик бизнес ва тадбиркорликка эътибор қаратилаётгани ҳам бежиз эмас. Тараққиётнинг ҳозирги босқичида бизнесни ривожлантиришни қўллаб-қувватлаш масалаларида шаклланган ёндашувларни қайтадан кўриб чиқиш, тадбиркорлик субъектларининг ҳуқуқлари ва қонуний манфаатларини муҳофаза қилишнинг янги тизимини яратиш борасида Президентимиз ташаббуси билан чуқур ислоҳотлар амалга оширилмоқда. Жумладан, давлатимиз раҳбарининг 2017 йил 19 июндаги "Бизнеснинг қонуний манфаатлари давлат томонидан муҳофаза қилиниши ва тадбиркорлик фаолиятини янада ривожлантириш тизимини тубдан такомиллаштиришга доир чора-тадбирлар тўғрисида”ги Фармонини ижро этиш ва Ўзбекистон Республикаси Савдо-саноат палатаси фаолиятини самарали ташкил этилишини таъминлаш мақсадида қабул қилинган “Ўзбекистон Республикаси савдо-саноат палатаси фаолиятини ташкил этишни такомиллаштириш тўғрисида”ги Қарорлари соҳани янада ривожлантиришда янги босқични бошлаб берди.

Мазкур жараёнда қонунчилик, суд ва ижро этувчи ҳокимиятлар, шунингдек, банк-молия ташкилотлари ва бозор инфратузилмасининг бошқа субъектлари ҳамда нодавлат ташкилотлари ўртасида ўзаро ҳамкорликда иш олиб бориш ҳам муҳим аҳамият касб этади.

Бугунги кунда Ўзбекистон Республикаси Олий Мажлиси Қонунчилик палатаси депутатлари ўзлари сайланган ҳудудларда тадбиркорлик субъектлари билан бевосита мулоқотлар олиб бориб, уларнинг қийнаётган масалаларни ечиш бўйича амалий чора-тадбирларни кўриш билан бир қаторда қонунчиликни такомиллаштириш йўналишида фаолият олиб боришмоқда.    

Ушбу вазифалар ижросини таъминлаш, хусусан тадбиркорлик фаолиятининг жадал ривожланиши, унинг ҳуқуқий кафолатларини янада  мустаҳкамлаш мақсадида жорий йилнинг 20 октябрь куни Ўзбекистон Республикаси Олий Мажлисининг Қонунчилик палатаси ва Ўзбекистон Республикаси Савдо-саноат палатаси ўртасида ҳамкорлик битими имзоланди.

Мазкур битим томонлар ўртасида ижтимоий шериклик муносабатларини ривожлантириш ҳамда хусусий мулкчилик ва тадбиркорлик субъектларининг ҳуқуқлари ҳамда қонуний манфаатларини ишончли муҳофаза қилишга қаратилган муҳим ҳуқуқий ҳужжат ҳисобланади.

Ҳамкорлик битимида хусусий мулкчиликни ва тадбиркорликни ривожлантириш бўйича эксперт гуруҳларини шакллантириш, Қонунчилик палатасида қабул қилинадиган қонун лойиҳаларининг ишланиши ва қабул қилиниши жараёнларига Савдо-саноат палатаси вакилларини жалб этиш, шунингдек, жойлардаги ҳақиқий ҳолатни ўрганишда ҳамда қонун ҳужжатларини назорат-таҳлил тартибида ўрганишда палата вакиллари билан яқин ҳамкорликда фаолият олиб бориш кўзда тутилган.

Шу билан бирга, тадбиркорлик соҳасига оид қонун лойиҳалари ишлаб чиқилишида қонун лойиҳаларининг тадбиркорлик фаолиятига таъсирини баҳолаш бўйича хулосалар Савдо-саноат палатаси  томонидан тақдим этиб борилиши белгиланмоқда.

Тадбирда иштирокчилар томонидан тадбиркорлар ҳуқуқларини таъминлаш ва хусусий мулкни ишончли ҳимоя қилиш жараёнида Ўзбекистон Республикаси Олий Мажлиси Қонунчилик палатаси, ҳуқуқни муҳофаза қилиш органлари ва жамоат ташкилотларининг ўзаро ҳамкорлиги муҳим ўрин тутиши алоҳида таъкидланди. Бу жараёнда тадбиркорлик фаолияти эркинлигининг кафолатлари тўғрисидаги қонунчилик талабларининг қатъий ижро этилиши, тадбиркорлик субъектларининг қонуний манфаатлари ва ҳуқуқлари поймол этилгани учун масъул шахслар, жумладан, назорат, ҳуқуқни муҳофаза қилиш ва ваколатли давлат органларининг жавобгарлиги таъминланиши устидан назоратни кучайтириш ўз самарасини бериши қайд этилди.