08.11.2017 558

Тошкент шахрида Узбекистон-Корея бизнес форуми ўтказилди.


Жорий йилнинг 7-11 ноябрь кунлари Корея Республикаси ишбилармон доиралари делегацияси Кичик ва ўрта бизнес федерацияси раисининг ўринбосари Ли Хонг Ву раҳбарлигида Ўзбекистонга ташриф буюрди.

Хусусан, мазкур ташриф доирасида 2017 йил 8 ноябрь куни Ўзбекистон Савдо-саноат палатаси томонидан Ўзбекистон Республикаси ташқи иқтисодий фаолият Миллий банки билан хамкорликда икки давлат тадбиркорлари иштирокидаги Ўзбекистон-Корея бизнес-форуми ва кооперация биржаси ўтказилди. Ушбу тадбир ишбилармонлик ҳамкорлигини ривожлантириш, шунингдек қўшма лойиҳаларни амалга ошириш мақсадида чет эл инвестицияларини жалб қилиш учун қўшимча рағбат сифатида хизмат қилади.

Тадбирни ташкил этишдан кўзланган асосий мақсад икки давлат тадбиркорлари ўртасида савдо алоқалари йўлга қўйилиши ва кенгайишини қўллаб-қувватлаш, янги қўшма корхоналар сонини ҳамда икки томонлама маҳсулот айланмасини оширишдан иборат.

Форумда қурилиш, озиқ-овқат саноати, савдо, заргарлик буюмлари, тиббиёт анжомлари, шахсий гигиена буюмлари, газбаллон ускуналари, қишлоқ хўжалиги машиналарини ишлаб чиқариш, АКТ, қадоқлаш материаллари, тўқимачилик ва тўқимачилик қурилмалари, логистика, мева-сабзавот маҳсулотларини қайта ишлаш ҳамда тайёр маҳсулотларни чиқариш каби соҳаларда фаолият юритаётган Жанубий Кореянинг йирик компанияларидан келган 60 га яқин вакил, шунингдек, Ўзбекистон Республикасининг турли вилоятларида жойлашган йирик корхоналар ва компанияларнинг 150 дан ортиқ вакиллари иштирок этди.

Ишбилармонлик учрашуви чоғида икки давлат тадбиркорлари ўртасидаги ўзаро ҳамкорликни мустаҳкамлаш бўйича масалалар муҳокама қилинди.

Шу билан бирга, тадбир давомида ўзбек компаниялари вакилларининг эътиборига Кореянинг «ЭКСИМБАНК»и томонидан Ўзбекистон Миллий банкига корейс компаниялари қурилмаларини харид қилиш учун ажратиладиган кредит линиялари тақдим этилди.

Корея Республикаси ишбилармон доиралари делегацияси шунингдек «Ўзбекистонда ишлаб чиқарилган» кўргазма-ярмаркасига ҳам ташриф буюрди.

Ташриф давомида Корея ишбилармон доира вакиллари 9 ноябр куни Фаргона водийсининг "Кўкон" эркин иқтисодий зонага ташриб буюриб, махаллий ишлаб чиқарувчилар билан учрашадилар. 

Қайд этиш керакки, Ўзбекистон Марказий Осиё давлатлари ичида Кореянинг асосий савдо ҳамкори ҳисобланади, жумладан Корея Республикасининг минтақа давлатлари билан маҳсулот айланмаси ҳажмининг ярмидан ортиғи Ўзбекистон улушига тўғри келади.

Асосий экспорт позициялари: транспорт, қурилиш ва туризм хизматлари, пахта толаси, пластмасса ва ундан ясалган буюмлар, қурилиш материаллари, толали масса.

Импорт позициялари: автотранспорт воситаларининг қисмлари, механик ва электр ускуналари, пластмасса ва ундан ясалган буюмлар, қорма металлдан ишланган буюмлар, кимёвий маҳсулотлар, резина маҳсулотлари ва ҳ.к.

Ўзбекистон Республикасига жалб қилинган Корея Республикасининг тўғридан-тўғри инвестициялари ҳажми 7 млрд. АҚШ долларидан ошди.

Бугунги кунда Ўзбекистон Республикасида корейс капитали иштирокидаги 461 та корхона фаолият юритмоқда (386 та қўшма корхона ва 75 та 100% корейс капиталига эна корхона). Ўзбекистонда 75 та корейс компаниясининг ваколатхонаси аккредитациядан ўтган.

Ушбу компаниялар фаолиятининг асосий йўналишлари: нефтгаз, нефткимё ва кимё соҳалари, қазиб чиқариш, машинасозлик, электр техник, тўқимачилик, ахборот-коммуникация технологиялари, транспорт ва логистика, туризм, қурилиш материалларини ишлаб чиқариш, қишлоқ хўжалиги маҳсулотларини қайта ишлаш ва бошқалар.

 

ЎзССП Ахборот хизмати