13.11.2017 966

“Глобал тадбиркорлик ҳафталиги” старт олди


Ўзбекистон Савдо-саноат палатасининг ҳамкорликдаги энг шов-шувли лойиҳаси “Глобал тадбиркорлик ҳафталиги” старт олди. Хафталик 13-18 ноябр кунлари ўтказилади.

Глобал тадбиркорлик ҳафталиги ҳар йили дунё бўйлаб 160 та мамлакатда ўтказилиб, маҳаллий тадбиркорлик экотизимини яратиш ва ривожлантиришга кўмак бериш бўйича фаолият олиб боради.

Глобал тадбиркорлик ҳафталигини ўтказишдан асосий мақсад – муваффақиятга эришган тажрибали тадбиркорлар билан ёш тадбиркорлар ўртасида ўзаро ҳамкорлик муносабатларини шакллантириш, уларни янги ғояларга илҳомлантириш, мамлакатимизда тадбиркорлик экотизимини ривожлантириш, бизнесни ривожлантиришда қўл келадиган дунёдаги илғор тажриба ва замонавий воситалар билан ёшларни таништириш ҳамда Ўзбекистонда тадбиркорликни янада ривожлантиришга қаратилган таклифларни ишлаб чиқиш ва амалиётга тадбиқ этишдан иборат.

Глобал тадбиркорлик ҳафталиги Ўзбекистон миллий тадбиркорлик экотизими яратиш, мамлакатга хорижий инвестицияларни жалб қилиш, тадбиркорлар ўртасида ўзаро ҳамкорлик муносабатларини мустаҳкамлаш учун муҳим катализаторга айланиши кутилмоқда.

Ҳафталик Ўзбекистон Савдо-саноат палатаси, Ўзбекистон ёшлар иттифоқи, Халқаро бизнес ва технологиялари ассоциацияси ҳамда манфаатдор ташкилотлар ва тадбиркорлик субъекти вакиллари билан ҳамкорликда ташкил этилмоқда.

Ҳафталик доирасида тадбиркорликни ривожлантиришга қаратилган 30 дан ортиқ тадбирлар, маҳаллий ва хорижий бизнес вакиллари билан ёшлар учрашувлари ташкил этилиши режалаштирилган.

Шунингдек, Самарқанд, Фарғона вилоятлари ва Тошкент шаҳрида муваффақиятли тадбиркорлар иштирокида 5000 дан ортиқ ёш тадбиркорлар учун “Муваффақиятга эришиш сирлари” мавзусида маҳорат дарслари, “ЖВ МАН Ауто - Узбекистан”, “Сам Антеп Гилам”, “Артел”, “Турон”, “ГроундЗеро”, “Мурад Буилдингс”, “Корзинка”, “Декос, “ОффиcеМаркет”, “Жусиc”, “Нестле Узбекистан” каби 10 дан ортиқ йирик корхоналарга ёшлар ташрифлари уюштирилиши режалаштирилган.

Тадбирларда юртимиздаги 50 дан ортиқ тажрибали тадбиркорлар билан биргаликда Россия, Исроил, Озарбайжон, Грузия, Қозог‘истон, Қирғизистон, Тожикистон каби давлатлардан 40 дан ортиқ хорижий инвесторлар, бизнесменлар, маркетологлар ва малакали тренерлар иштирок этиши кутилмоқда.