21.12.2018 1015

Бизнес юритишнинг ташкилий-ҳуқуқий масалалари.


Ўзбекистон  Республикаси Савдо-саноат палатаси  ва Тошкент давлат юридик университети ҳузуридаги Юридик кадрларни халқаро стандартлар бўйича профессионал ўқитиш маркази томонидан “Бизнес юритишнинг ташкилий-ҳуқуқий масалалари” мавзусида “давра суҳбати” ташкил қилинди.

“Давра суҳбати”да ССП масъул ходимлари, марказнинг профессор-ўқитувчилари ва “Юриспруденция” йўналиши бўйича қайта тайёрлаш ва малака ошириш курси тингловчилари иштирок этдилар.

Ўзбекистон Республикаси Савдо-саноат палатаси ҳузуридаги Ҳакамлик судининг раиси, ю.ф.н., доц. Фозилжон Отахонов ўз маърузасида 2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифаларни ижро этиш, хусусий мулкчилик ва тадбиркорлик субъектларининг ҳуқуқлари ва қонуний манфаатларини ишончли муҳофаза қилиш кафолатларини кучайтириш мақсадида 2018 йил 9 июлда “Ўзбекистон Республикаси Савдо-саноат палатаси тўғрисида”ги Қонун янги таҳрирда қабул қилинганлигини таъкидлаб, мазкур Қонунга мувофиқ Ҳакамлик судлари илк бор Палата тизимига киритилганлиги, иқтисодий низоларни ҳал қилиш учун Палатага Ҳакамлик судларини ташкил этиш ҳуқуқи берилганлиги, Ҳакамлик судлари Палата ва унинг ҳудудий бошқармалари ҳузурида фаолият кўрсатиши алоҳида моддада белгиланганлигини қайд қилди.

“Давра суҳбати” кун тартибидаги масалалар савол-жавоблар асосида ҳар томонланма муҳокама қилинди. Жумладан, тадбикорлик субъектларининг ҳуқуқ ва қонуний манфаатларини ҳимоя қилишда Савдо-саноат палатасининг роли, Палата фаолиятининг ҳуқуқий асослари, Палата ҳузурида Президент қарори билан ташкил қилинган Тошкент халқаро арбитраж марказининг асосий вазифалари ва функциялари тўғрисида батафсил  фикр алмашилди.

 

Ўз ССП Ахборот хизмати