24.09.2019 517

Ўзбекистон ва Туркия ишбилармон доиралари иштирокида бизнес-форум ва “В2В” учрашуви ўтказилди.


Ўз

Ўзбекистон Савдо-саноат палатаси ҳамда Туркиядаги Ўзбекистон Республикаси элчихонаси томонидан Туркиянинг мустақил ишлаб чиқарувчилар ва тадбиркорлар уюшмаси “MUSIAD” раҳбари А.Каана бошчилигида 30 кишидан иборат делегация вакилларининг Ўзбекистонга ташрифи амалга оширилди.

Ташриф доирасида жорий йил 24 сентябр куни соат 10-00да “International Hotel Tashkent” меҳмонхонасининг конференц-залида Ўзбекистон ва Туркия ишбилармон доиралари иштирокида бизнес-форум ва “В2В” форматидаги икки томонлама музокаралар бўлиб ўтди.

               

Ушбу ташрифдан мақсад - қурилиш саноати, қишлоқ хўжалиги, озиқ-овқат, нефт ва металлургия, гўшт ва сут маҳсулотлари, шамол ва қуёш энергияси, транспорт ва логистика соҳаларида музокаралар олиб боришдир.

Форум давомида Турк тадбиркорлари Ўзбекистонда инвестицион муҳитни янада яхшилаш, иқтисодиётни либераллаштириш, тадбиркорларнинг қонуний ҳуқуқ ва манфаатларини ҳимоя қилиш борасида амалга оширилаётган ишлар билан танишдилар.

      

Сўзга чиққанлар 2017 йил октябрь ойида Ўзбекистон Республикаси Президенти Шавкат Миромонович Мирзиёевнинг Туркияга амалга оширган давлат ташрифи, шунингдек, 2018 йил апрель ойида Туркия Президенти Режеп Таййиб Эрдўғоннинг Ўзбекистонга қилган давлат ташрифи ўзбек-турк муносабатлари тарихида янги саҳифа очганини таъкидлаб ўтдилар.

    

Ушбу ташрифлар доирасида иқтисодиёт, савдо-сотиқ, банк-молия, инвестиция, туризм, транспорт-логистика, соғлиқни сақлаш каби соҳаларда имзоланган ҳужжатлар бугунги кунда икки томонлама муносабатларни сифат жиҳатидан янги поғонага кўтарилгани алоҳида таъкидланди.

    

Икки мамлакат ишбилармон доира вакиллари иштирокидаги «В2В» учрашувида Ўзбекистон ва Туркия ўртасидаги савдо-иқтисодий ҳамкорлик алоқаларини ривожлантириш истиқболлари, жумладан, икки мамлакат корхоналарининг ҳамкорлик алоқаларини янада жадаллаштириш бўйича ўзаро фикр алмашилди.

    

Унда мамлакатимизда фаолият юритувчи 50 га яқин тадбиркорлик субъектлари иштирок этди. Музокараларда Ўзбекистон-Туркия савдо-иқтисодий ҳамкорликни янада ривожлантириш истиқболлари, жумладан, Ўзбекистон ва Туркия корхоналари ўртасида шериклик муносабатларини чуқурлаштириш бўйича фикр алмашиш масалалари хам муҳокама қилинди.

Делегация аъзоларининг юртимизга ташрифи давом этмоқда, ташриф дастурига кўра делегациянинг туризм салоҳияти билан танишиш мақсадида тарихий шахарлардан Бухоро ва Самаркандга ташрифини амалга ошириш ўрин олган.

Сп    

2019 йил январ-май ойларида Ўзбекистон Республикаси ва Туркия Республикаси ўртасидаги ўзаро товар айланмаси ўтган йилнинг шу даврига нисбатан 17.5% га ўсиб, 953,2 млн. АҚШ долларини ташкил қилди. 

Шу ўринда айтиш жоизки, Ўзбекистонга бўлган давлат ташрифи давомида Ўзбекистон Савдо-саноат палатаси ва “MUSIAD” ташкилоти ўртасида ҳамкорлик битими имзоланган бўлиб, Тошкент шаҳрида “MUSIAD” нинг ваколатхонаси очилган.