23.04.2016 2766

Пойтахтимизда етакчи рестораторлар ва отельерлар билан муаллифлик учрашуви бўлиб ўтди


2016 йилнинг 22 апрель куни Lotte City Hotel Tashkent Palace​ меҳмонхонасида соат 17:00 да «Ўзбекистондаги етакчи рестораторлар ва отельерлар билан муаллифлик учрашувлари» лойиҳаси доирасида меҳмонхона бизнесининг илғор мутахассислари билан Иккинчи муаллифлик учрашуви бўлиб ўтди.

Мамлакатимиз раҳбариятининг Ўзбекистон Республикаси иқтисодиётининг хизмат кўрсатиш, рестораторлик ва меҳмонхона тармоқларини янада яхшилаш ва ривожлантиришга қаратилган фармойишидан келиб чиқиб, кўп сонли чет эллик меҳмонларни жалб қилган ҳолда, мунтазам равишда ўтказилиб келинаётган халқаро тадбирлар юзасидан мазкур йўналишларни ривожлантириш аҳамиятини ҳисобга олиб, шунингдек, Ўзбекистон Республикаси аҳолиси учун сифатли хизматни таъминлаш мақсадида, 2015 йилнинг февраль ойида Ўзбекистон Республикаси Савдо-саноат палатаси қошида Ресторан ва меҳмонхона бизнесини ривожлантириш қўмитаси ташкил этилди.

Хусусан, ёшларнинг касбий кўникмалари ва билимларини шакллантириш мақсадида, Ўзбекистон Савдо-саноат палатаси, Ресторан Бизнеси Академияси («TBA International» МЧЖ) томонидан Ўзбекистон ССП қошидаги Ресторан ва меҳмонхона бизнесини ривожлантириш қўмитаси ҳамкорлигида шу йилнинг март ойидан бошлаб «Ўзбекистондаги етакчи рестораторлар ва отельерлар билан муаллифлик учрашувлари» лойиҳаси тақдим этилмоқда.

Лойиҳанинг асосий мақсади ёш авлодни (ихтисослашган коллежларнинг ўқувчилари, туризм факультетлари талабалари, шунингдек, барча манфаатдор шахслар) ресторан-меҳмонхона бизнесига оид амалий билимлар, кўникмалар, иш қоидалари билан таништиришга амалдаги ресторан ва меҳмонхона лойиҳаларидан машҳур мутахассислар ва маҳорат эгаларини жалб этишдан иборат.

Навбатдаги муаллифлик учрашувига махсус меҳмонлар тариқасида Ўзбекистон, Қозоғистон, Озарбайжондаги энг яхши меҳмонхоналарда иш тажрибасига эга бўлган, халқаро меҳмонхона бизнеси эксперти – Ирина Овсянникова ҳамда Ўзбекистон, БАА, Қатардаги етакчи меҳмонхоналарда фаолият тажрибасига эга бўлган, "Wyndham Tashkent" меҳмонхонасининг маркетинг ва савдо бўлими менежери Икром Агзамовлар таклиф этилди.

Шунингдек, тадбир иштирокчилари учун алоҳида семинар ташкил этилди: «Назариядан амалиётга – Университетдан Меҳмонхонага – Real life of Hotelier. Салоҳиятли ва мижозларга йўналган ходимни мослаштириш, аниқлаш ва унинг меҳмонлар билан мулоқот қилиш маҳоратини мукаммалликка етказиш!»

Экспертларнинг 2 соат давом этган тақдимотлари бой ахборот ва тақдимот материаллари билан тўлдирилган бўлиб, «саволлар ва жавоблар» бўлими доирасида барча иштирокчилар муаллифлик учрашувларининг таклиф этилган меҳмонларига ўзларини қизиқтирган саволларини бериш имкониятига эга бўлдилар.

Тадбирда республикадаги ўндан ортиқ университетларнинг талабалари, туризм коллежи, бошқа коллеж ва лицейларнинг ўқувчилари, Ўзбекистон Савдо-саноат палатаси ва Рестораторлар ва отельерлар уюшмаси раҳбарияти ҳамда аъзолари, шунингдек, ресторан-меҳмонхона бизнесида банд бўлган рестораторлар ва мутахассислар иштирок этди.

Эслатиб ўтамиз, Биринчи муаллифлик учрашуви 2016 йил 22 март куни ўтказилган бўлиб, унга махсус меҳмон сифатида машҳур ресторатор, «Караван Групп» тармоғининг бошқаруви ҳамкори Тимур Мусин таклиф этилган эди.

Ўзбекистон Савдо-саноат палатаси

Матбуот хизмати