07.07.2020 389

COVID-19 даврида ва ундан кейин Марказий Осиёда халқаро арбитраж амалиёти ва муаммолари


“Астана” халқаро молиявий маркази ҳузуридаги Суд ва Халқаро арбитраж маркази томонидан Ўзбекистон Республикаси Савдо-саноат палатаси ҳузуридаги Халқаро тижорат арбитраж суди иштирокида  2020 йил  7 июлда Нур-Султон шаҳрида “COVID-19 даврида ва ундан кейин Марказий Осиёда халқаро арбитраж амалиёти ва муаммолари” мавзусида онлайн режимида вебинар ташкил қилинди.  

Вебинарда Қозоғистон, Қирғизистон, Туркманистон ва Ўзбекистондан халқаро арбитрлар, адвокатлар, халқаро тижорат арбиртажи соҳаси олимлари, бизнес вакиллари иштирок этишди.

Тадбирда Қирғизистон Республикаси Савдо-саноат палатаси ҳузуридаги Халқаро ҳакамлик судининг раиси Шамарал Майчиев “COVID-19 ва Қирғизистон Республикаси Савдо-саноат палатаси ҳузуридаги Халқаро ҳакамлик судининг янги имкониятларининг ривожланиши” ва Ўзбекистон Республикаси Савдо-саноат палатаси ҳузуридаги Халқаро тижорат арбитраж  судининг раиси, юридик фанлар доктори, профессор в.б. Фозилжон Отахонов “Ўзбекистонда халқаро арбитраж ва ҳакамлик судларининг ривожланиш истиқболлари” мавзуларида маърузалар қилдилар.

Вебинар модератори “Астана” халқаро молиявий маркази ҳузуридаги Суд ва Халқаро арбитраж марказининг аппарати раҳбари Кристофер Кэмпбелл-Холт арбитраж муҳокамаси ва унинг қуйидаги афзалликларига, яъни тарафларнинг арбитрларни мустақил танлаш имконияти, тезкорлик, тежамкорлик, арбитрларнинг юқори малакаси, ҳал қилув қарорларининг узил-кесиллиги ва ижроси кафолатланганлиги масалаларини батафсил ёритиб берди.

Вебинар иштирокчилари эътиборига Ўзбекистон Республикаси Савдо-саноат палатаси тизимидаги Ҳакамлик судлари  томонидан 2007–2020 йиллар давомида умумий суммаси 1,1 трлн. сўм бўлган 27 916 та ишлар, Халқаро тижорат арбитраж суди томонидан эса 68 ишлар кўрилган бўлиб, даъво суммаси 15,9 млрд. сўм, 4,6 млн. АҚШ доллари, 4,2 млн. Россия рубли 39,8 минг Еврони ташкил қилганлиги ҳавола қилинди.

Кўрилган ишларда даъвогар ва жавобгар сифатида Беларусь Республикаси, БАА, Германия, Дания, Қозоғистон, Қирғизистон, Россия, Сингапур, Туркия, Украина, Ўзбекистон, Хитой каби мамлакатларнинг компаниялари иштирок этганликлари таъкидланди.

Тадбирда маърузачиларга низоларни муқобил ҳал қилиш усули бўлган халқаро арбитражлар фаолиятида пандемия шароитида юзага келаётган масалалар бўйича саволлар берилди.

ССП Матбуот-хизмати